Օդային աղետ՝ Հնդկաստանում. զոհերի թիվն աճում է

Ամսաթիվ: 20:08:08 - Դիտում: 71

Հնդկական Air India Express ավիաընկերության օդանավի Կերալա նահանգի Կոժիկոդե քաղաքում վթարի հետևանքով զոհվել է 20 մարդ, վիրավորվել՝ ավելի քան 140-ը: Այս մասին հայտնում է Hindustan Times-ը՝ հղում անելով պաշտոնյաներին:

Ըստ պարբերականի՝ ընդհանուր առմամբ ինքնաթիռում եղել է 191 մարդ: Երկու օդաչուները զոհվել են: 15 մարդ ծանր վիրավորում է ստացել:

Հնդկաստանի քաղաքացիական ավիացիայի նախարար Հարդիփ Սինգհ Փուրին հայտնել է, որ «փրկարարական աշխատանքներն ավարտվել են», և «տուժածներն օգնություն են ստանում քաղաքի տարբեր հիվանդանոցներում»:

Հիշեցնենք, որ Կոժիկոդի օդանավակայանում վայրէջքի ժամանակ ուժեղ անձրև էր տեղում: Հնդկաստանի քաղաքացիական ավիացիան (DGCA) հաղորդել է, որ ինքնաթիռը բարձր արագությամբ դուրս է եկել թռիչքուղուց, ընկել ձորը և բաժանվել երկու մասի: Բռնկումից հաջողվել է խուսափել:

Օդանավակայանը ներկայում փակ է: