Հայաստանի քաղաքացիական բնակչության դեմ ագրեսիվ գործողությունները համարժեք պատասխան են ստանալու. ԱԳՆ խոսնակ

Ամսաթիվ: 20:07:14 - Դիտում: 49

Հայաստանի քաղաքացիական բնակչության անվտանգության դեմ ուղղված ագրեսիվ գործողությունները ստանալու են իրենց համարժեք պատասխանը, այսօր հայտարարել է Արտգործնախարարության խոսնակ Աննա Նաղդալյանը:
«Ադրբեջանական կողմը շարունակում է իր ագրեսիվ գործողությունները հայ-ադրբեջանական սահմանին՝ դիտավորյալ թիրախավորելով քաղաքացիական ենթակառուցվածքներն ու բնակչությունը և ընդլայնելով լարվածության աշխարհագրությունը: Այսօր հարվածային ԱԹՍ-ի միջոցով հրետանակոծման է ենթարկվել Բերդ քաղաքի քաղաքացիական ենթակառուցվածքի օբյեկտները», - ասված է ԱԳՆ խոսնակի մեկնաբանությունում:
«ՀՀ քաղաքացիական բնակչության անվտանգության դեմ ուղղված այս ագրեսիվ գործողությունները ստանալու են իրենց համարժեք պատասխանը, որի ողջ պատասխանատվությունը կրում է ադրբեջանական կողմը», - ԱԳՆ լրատվության և հանրային կապերի վարչության փոխանցմամբ՝ հայտարարել է Աննա Նաղդալյանը:
Ադրբեջանական զինուժի կողմից Բերդի քաղաքացիական ենթակառուցվածքները թիրախավորելու մասին ավելի վաղ հայտնել էր Պաշտպանության նախարարությունը՝ նշելով, որ տուժածներ չկան:
Այնուհետև Պաշտպանության նախարարության խոսնակ Շուշան Ստեփանյանն իր ֆեյսբուքյան էջում գրեց՝ «ՀՀ ԶՈՒ ստորաբաժանումները ոչնչացնում են Տավուշի սահմանամերձ բնակավայրերը հրետակոծած ադրբեջանական հենակետերը», և հրապարակեց համապատասխան տեսանյութը: